RÉFLEXION FINALE

Unha vez chegados a este punto, penso que é preciso facer unha reflexión final sobre todo o aprendido e comentado ó longo do curso.

Ó principio, antes de comezar coa primeira clase, pensei que a materia ía traballar máis o coñecemento da lingua francesa en si. Na primeira clase do semestre, decateime de que, como xa o nome da materia o indica, iamos traballar máis a didáctica desta. Aquí foi onde o noso querido profesor, Carlos Valcárcel, contounos resumidamente o que iamos realizar, e nós, todos os seus alumnos, mirabámonos con caras de susto a medida que levabamos feitas cada unha das tarefas, xa que a seguinte sempre era máis complicada que a anterior.

Isto foi así dende o principio, xa que cada tarefa (ou “tâche”, como todos diciamos ó falar en castelán, cunha incorrecta pronuncia,por certo) complicábase, aumentando o nivel e a dificultade. Pero, unha vez feitas e entregadas, xa non parecían tan complicadas porque aprendéramos cousas novas, podendo así superar outras futuras de maior complexidade.

Así, aprendín que todos podemos acadar algo se nos esforzamos. O aprendizaxe é un camiño longo que debe ser traballado parte por parte, entendendo cada unha destas á perfección, para así poder chegar ó fin dunha verdadeira aprendizaxe significativa para, a partir desta, ir creando outras novas e de maior dificultade.

Citando algúns aspectos importantes que aprendín  ou conseguín durante este curso nesta materia, debo destacar moitos dos coñecementos sobre a realización de tarefas e actividades en lingua estranxeira segundo as características do alumnado, ademais da capacidade de creación de actividades de comprensión e expresión, tanto oral como escrita.

 

Non debemos esquecer que, agora, grazas a todos estes traballos, coñecemos mellor e controlamos máis (ou iso deberiamos) todas as fases do proceso de ensinanza e aprendizaxe. Sen dúbida algunha, o máis dificultoso deste foi o proceso de  avaliación, xa que tiñamos que seleccionar rigorosamente todos os criterios que iamos ter en conta, relacionados cos obxectivos e contidos tratados nas actividades.

Finalizando, quero deixar claro que sinto alegría e satisfación en canto ó meu traballo nesta materia, xa que podería dicir que me sinto máis competente co meu futuro traballo, véndome capaz de realizar con máis facilidade todas e cada unha das funcións da profesión de docente en Educación Primaria.

Por último de todo, poño de manifesto que estou segura que todo o traballo e esforzo posto nesta materia de “Lingua francesa e a súa didáctica” non existiría de non ser pola presenza e axuda do noso profesor, quen estivo con nós cada momento, resolvendo calquera dúbida existente.